ما ينفعش تفضل في علاقة أنت فيها بتهون على الطرف التاني، يسيبك عادي في المشكلة و يتقمص دور المظلوم، سواء أنت الغلطان أو هو، بتهون عليه و يمشي، و يفضل مستني أنك تروح لُه في النهاية و أنت إللي تراضيه، العلاقات دي مُرهقة، بتستنزفك، بتاكل من قلبك و مشاعرك، بتخليك فاضي من جواك، من كتر المشاكل إللي بتتكرر و دايمًا بتكون أنت المسؤول عن حلها.
أساس العلاقات -الحنية و التفاهم و الصداقة- الحنية أنك متهونش على الشخص التاني، سواء أنت الغلطان أو هو، أيًا كانت المشكلة الحنية مش بتخليكم تبعدوا و تكابروا، و التفاهم هو إللي بيحلها، أن يكون في دايمًا مساحة للنقاش، يحصل مهما يحصل، احنا قبل أي حاجة أصحاب، ماصدرش عليك أحكام تحت مُسمى الحب و الغيّرة، و أسيبك و أمشي، لا أنا هسمعك علشان احنا أصدقاء في النهاية، زي ما كنت بسمعك زمان، مش بعد ما ضمنت وجودك.
العلاقة يا تكون ملجأ أمن ليك من العالم، و تلاقي فيها شخص مبتهونش عليه، شخص بياكل حُزنك بمُجرّد كلامك معاه، شخص بيعرف يحتويك بيعرف يسمعك و يخليك تحكّي لُه أي شيء بدون خوف من ردة فعلُّه و بُعده عندك، شخص حنين قلبه بيعرف يحب .. يا علاقة تكون زي ثُقب أسود في حياتك وعليك انك تختار...