يختار الحلو الزين الطيب وينقي على نضيف
الموت تجريف
الموت تخاطيف
بيخلص أول بأول ويريح من هم الدنيا كل أمين وشريف
الموت...
عارف انها سجن المؤمن،، جنة "باردون" للحلاليف !
الموت حريف
بيشد القلب من الضلعين وبيدفنه حي مع حبايبه
وبدون إذن وتكليف
الموت إنسان
بيموت م الخوف
فبيحضن ف الغاليين وياخدهم
جنة وعيش بحقيقي بجد ومش وهم وتخاريف
الموت غلبان
الموت حيران
الموت مش عدو لينا ومرصاد،
الموت كياد، لكن
خصم عنيد وشريف
الموت ده حياة واحنا النايمين
وهتصحى فيوم على هزة ايده
يقوللك صحصح فوق يا خفيف
الموت حريف
الموت يا لطيييف
يقتلنا فراق لكن محسوم
فيه ناس تانية قتلونا فراق
مليان سؤالات ووجع ونزيف
الموت ف فراقه واضح وشريف
الموت...تشريف
دينا عاصم